Головкин мен «Канело» үшінші рет жекпе-жек өткізуге келісті – БАҚ

WBA нұсқасы бойынша орта салмақтағы қазіргі әлем чемпионы мексикалық Сауль Альварес пен сол салмақтағы IBF және IBO белбеулерінің иегері қазақстандық Геннадий Головкин үшінші рет жекпе-жек өткізуге келісті,  деп хабарлайды vesti.kz. 

Бұл туралы журналист, The Athletic инсайдері Майк Коппинджер Twitter желісінде жазды. Оның айтуынша, екі тарап осыдан бірнеше ай бұрын келісім жасасқан. Жекпе-жектің өтетін уақыты шамамен, 2021 жылдың мамыр айы.

Журналист бұл жекпе-жектен Сауль Альварес $45 млн, ал Геннадий Головкин $30 млн табыс табатынын айтты. Екінші бокс кеші ұйымдастырушыларға $27 млн кіріс әкелгендіктен, үшінші жекпе-жек көрерменсіз өтпейді.

Еске сала кетсек, 2017 жылдың қыркүйегінде болған алғашқы жекпе-жек тең нәтижемен аяқталса, 2018 жылы өткен екінші айқаста төрешілердің шешімімен Альварес аз ғана басымдықпен жеңіске жетті.

Осы күзде GGG поляк боксшысы Камил Шереметамен жекпе-жек өткізеді. Ал «Канело» қыркүйекте британ боксшысы Каллум Смитпен кездеседі.