«Қазсушар» шаруаларға бақшасын суаратын су бергені үшін 1 млрд теңгеге жуық ақша алмақ

Қазақстанда шаруалардың «Қазсушар» мекемесіне 1 млрд теңгеге жуық қарыз. Бұл туралы Су ресурстары және ирригация министрлігі осындай мәлімдеме жасады, деп хабарлайды Azattyq Rýhy.

Министрлік мәліметінше, су тұтынушылардың «Қазсушар» РМК алдындағы суармалы су жеткізу қызметі бойынша дебиторлық берешегі 966 млн теңгеден асады. Кәсіпорын жүргізген түсіндіру жұмысының нәтижесінде бұл көрсеткіш екі еседен астам төмендеді. Мәселен, 2025 жылдың соңында берешек көлемі 2,13 млрд теңге болған.

«Қазіргі таңда Қызылорда облысындағы берешек көлемі 251,3 млн теңгені, Түркістан облысында 341,7 млн теңгені, «Д. Қонаев атындағы Үлкен Алматы каналы» филиалында 211,3 млн теңгені, Жамбыл облысында 94,65 млн теңгені, Жетісу облысында 44,9 млн теңгені, Батыс Қазақстан облысында 21,3 млн теңгені, ал Шығыс Қазақстан облысында 1,4 млн теңгені құрайды», – делінген ведомство хабарламасында.

Қазіргі уақытта «Қазсушар» РМК су тұтынушылармен жаңа биллинг жүйесі арқылы электронды форматта келісімшарттар жасасып жатыр. Жүйеде автоматты шектеу қарастырылған: егер тұтынушының 5 мың теңгеден асатын дебиторлық берешегі болса, онымен жаңа келісімшарт жасалмайды.

«Дебиторлық берешек суару маусымының тұрақты өтуіне кедергі келтіреді. Су жеткізу қызметінен түскен қаражат гидротехникалық нысандарды тазалауға және жөндеуге, жанар-жағармай материалдарын, сондай-ақ жұмысқа қажетті басқа да материалдарды сатып алуға жұмсалады. Сондықтан диқандарды берешектерін мүмкіндігінше тезірек өтеуге шақырамыз. Бұл вегетация кезеңінде су шаруашылығы нысандарының тұрақты жұмысын қамтамасыз етуге мүмкіндік береді», – деді «Қазсушар» РМК бас директорының міндетін атқарушы Ануар Өскенбаев.