Астанада көпқабатты тұрғын үйдің балконынан өрт шықты

Елордалық құтқарушылар Ш. Уәлиханов көшесіндегі он қабатты тұрғын үйден шыққан өртті ауыздықтады. Тілсіз жау бірнеше қабатты шарпыған, деп хабарлайды Azattyq Rýhy.

Төтенше жағдайлар министрлігінің мәліметінше, өрт алдымен алтыншы қабаттағы пәтердің балконынан басталған. Кейін жалын жоғары қарай өршіп, жетінші қабатқа және сегізінші қабаттың балконына ішінара таралған.

ТЖМ қызметкерлерінің жедел әрекетінің арқасында оттың пәтерлердің ішіне өтіп кетуіне жол берілмеді.

«Мамандар өртті дер кезінде оқшаулап, толықтай сөндірді. Адам шығыны мен зардап шеккендер жоқ. Қазіргі уақытта өрттің шығу себебі анықталып жатыр», — деп хабарлады мекеменің баспасөз қызметі.