Жазушы, қоғам қайраткері Мырзагелді Кемел қайтыс болды

Жазушы, қоғам қайраткері Мырзагелді Кемел қайтыс болды. Бұл ақпаратты Мәдениет және спорт министрлігінің баспасөз қызметі растады, деп хабарлайды Azattyq Rýhy тілшісі.

Мырзагелді Кемел 1949 жылы 15 қаңтарда Оңтүстік Қазақстан облысы, Мақтарал ауданында дүниеге келген. 1971 жылы Ташкент ирригация және ауыл шаруашылығын механикаландыру инженерлері институтының ауыл шаруашылығын электрлендіру мамандығын, 2000 жылы М.Х.Дулати атындағы Жамбыл университетінің құқықтану факультетінің заңгер мамандығын тамамдаған. Еңбек жолын 1971 жылы Мақтарал ауданындағы «Октябрьдің 30 жылдығы» совхозында аға инженер болып бастаған.

1975–1992 жж. Мақтарал ауданында партия, кеңес қызметінде болды. 1992–1994 жж. кеңшар директоры, 1994–1995 жж. Қазақстан Республикасы Жоғарғы Кеңесінің депутаты, 1995 жылы Қазақстан Республикасы Министрлер Кабинеті жанындағы шетел инвестициясы жөніндегі комитетінің сектор меңгерушісі болып қызмет атқарған. 1995–2004 жж. бірінші, екінші шақырылған Қазақстан Республикасы Парламентінің депутаты болды.

Руханият саласында 10 кітап шығарған, бірнеше кітап аударған. 2004 жылы экономика ғылымының докторы ғылыми атағын алған. Қазақстан Республикасының Президенті жанындағы Мемлекеттік басқару академиясының профессоры, 14 монографияның, 100-ге жуық ғылыми мақала авторы.