Ақтауда бухгалтер жүкті әйелдер арқылы 146 млн теңге жымқырған
Оған қатысты сот үкімі жарияланды
Ақтау қаласында жүкті әйелдерді жалған жұмысқа орналастыру арқылы алаяқтық жасаған бухгалтер сотталып кетті, деп хабарлайды Azattyq Rýhy.
Тергеуді Маңғыстау облысында Қаржылық мониторинг агенттігі жүргізді. Бухгалтер өзінің кәсіби білімін пайдаланып, жүкті әйелдерді қолдауға арналған мемлекеттік әлеуметтік төлемдерді заңсыз алу схемасын ұйымдастырған.
Қатысушыларды тарту үшін Instagram әлеуметтік желісі арқылы өзін әлеуметтік төлемдерді рәсімдеу жөніндегі маман ретінде таныстырып, жәрдемақы көлемін арттыруға көмектесетінін уәде еткен.
Схеманы жүзеге асыру үшін туыстары мен таныстарының атына нақты қызмет жүргізбеген бірнеше жеке кәсіпкер тіркелген. Жеке кәсіпкерлер мен тартылған тұлғалардың электрондық цифрлық қолтаңбаларын пайдаланып, бухгалтер жалған жұмысқа қабылдау туралы бұйрықтарды, есеп айырысу тізімдемелері, еңбек шарттары және өзге де бухгалтерлік құжаттарды дайындап, заңды еңбек қатынастары бар деген жалған көрініс қалыптастырған.
Осы жалған мәліметтердің негізінде уәкілетті органдар жәрдемақыларды негізсіз жоғары мөлшерде тағайындаған. Кейбір кәсіпкерлер төлемдерді алғаннан кейін бұрын аударылған зейнетақы және әлеуметтік аударымдарды кері қайтаруды рәсімдеген.
«Мемлекетке 146 млн теңге көлемінде залал келтірілген. Қылмыстық жолмен алынған қаражатқа үш бөлмелі пәтер сатып алынғаны анықталды, тергеу барысында оған тыйым салынды. Сот үкімімен оған 5 жыл бас бостандығынан айыру жазасы тағайындалды. Пәтер мемлекет кірісіне тәркіленді.
Үкім заңды күшіне енді», – делінген агенттік хабарламасында
Көп оқылған
