Қазақстанда өкпені жасанды желдету аппараты өндірісі жолға қойылуы мүмкін

Түрік инвесторлары Қазақстанда өкпені жасанды желдету аппараты өндірісін жолға қоюы мүмкін. Бұл туралы «Kazakh Invest» ұлттық компаниясының баспасөз қызметі хабарлады. Мемлекетаралық келіссөздер шеңберінде Қазақстанның Түркиядағы елшілігі Biosys компаниясынан Biyovent ӨЖЖ аппаратының өндірісін игеру мүмкіндігі қарастырылып жатыр екен.

«COVID-19 індетінің жаппай таралуы аясында денсаулық сақтау органдары қосымша 3-4 мың ӨЖЖ құрылғысын сатып алуды жоспарлап отыр. Бұл аппараттардың сериялық өндірісі 2020 жылдың сәуірінде Түркияда іске қосылды. Бүгінгі таңда Biyovent ӨЖЖ аппараттары Нұр-Сұлтан қаласының Қалалық жұқпалы аурулар орталығына сынақ жүргізу үшін ұсынылған. Зерттеу нәтижелері бойынша өндірісті оқшаулау туралы шешім қабылданады», - деп атап өтті «Kazakh Invest» компаниясының №2 жобалармен жұмыс департаменті жобасының жетекшісі Әмір Ахметов.

Мамандар атап өткендей, Biosys – Түркиядағы биомедициналық жабдықтарды әзірлеуші және өндіруші компания. ӨЖЖ аппараты Түркия кәсіпорындарының тек ішкі өндірістік мүмкіндіктерін пайдалана отырып әзірленген және өндірілген. Бұл аппарат – Түркияның Ғылым, өнеркәсіп және технологиялар министрлігінің және Билкент технопаркінің көмегімен жасалған 5 жылдық ғылыми-зерттеу және тәжірибелік-конструкторлық жұмыстардың нәтижесі.

Biyovent ӨЖЖ құрылғысы әртүрлі пациенттерге арналған (неонаталды, балалар, ересектер). Аппаратты қысқа мерзім ішінде 100-ге жуық инженердің қатысуымен ASELSAN, Bilkent, Biosys, Arçelik атты түрік компанияларының консорциумы әзірледі.