Қазақстан азаматтарына Ираннан кету ұсынылды

Сыртқы істер министрлігі қазақстандықтарды Иранға сапарды уақытша кейінге қалдыруға, ал ел аумағында жүрген азаматтарды мүмкіндігінше тезірек кетуге шақырды, деп хабарлайды Azattyq Rýhy.

Ведомствоның мәліметінше, Таяу Шығыстағы жағдайдың күрт шиеленісуіне байланысты қауіпсіздік шараларын күшейту қажеттігі туындап отыр. Министрлік Иранда жүрген Қазақстан азаматтарына қырағылық танытып, жеке қауіпсіздік талаптарын сақтауды, ресми ақпарат көздерін тұрақты бақылауды және жергілікті билік органдарының нұсқауларын бұлжытпай орындауды ұсынды.

Сонымен қатар СІМ қазақстандықтарды Таяу Шығыс елдеріне сапар жоспарлағанда қазіргі ахуалды ескеріп, барынша салмақты шешім қабылдауға шақырды.

Министрліктің хабарлауынша, Қазақстанның Ирандағы дипломатиялық өкілдіктері штаттық режимде жұмыс істеп жатыр. Қосымша ақпарат алу және шұғыл байланыс үшін арнайы желілер ашылған.

Сыртқы істер министрлігінің кезекші дипломатына +7 7172 72 01 11 нөмірі арқылы (жұмыс күндері 19:00-ден 09:00-ге дейін, демалыс күндері тәулік бойы), Консулдық қызмет департаментіне +7 7172 72 05 00 нөмірі арқылы хабарласуға болады.

Қазақстанның Тегеран қаласындағы Елшілігінің кезекші байланыс нөмірі: +98 21 2256 5933, ұялы телефон және Whatsapp: +98 936 208 4672. Елшілік мекенжайы: Даррус ауданы, Хедаят көшесі, 83. Электрондық пошта: tehran@mfa.kz, kaztehran211@gmail.com.

Горган қаласындағы Қазақстан Бас консулдығына +98 912 298 0350 ұялы нөмірі, +98 173 252 0443 жұмыс телефоны және +7 701 771 34 01 Whatsapp арқылы хабарласуға болады. Мекенжайы: Едалат көшесі 97, Мина аллеясы. Электрондық пошта: gorgan@mfa.kz.

Бандер-Аббас қаласындағы консулдықтың байланыс нөмірі: +98 930 298 57 03 (ұялы телефон, Whatsapp). Мекенжайы: Фаджр көшесі, Вальфаджр-1, 7 үй. Электрондық пошта: kzvisabnd@gmail.com.

Министрлік азаматтарды жағдайды жіті бақылап, қажет болған жағдайда дипломатиялық өкілдіктермен жедел байланыс орнатуға шақырды.