Қазақстан мен Ресей әскерлері бірлескен әуе қорғаныс жаттығуларын бастады
Дайындық жұмыстары 20 ақпан мен 10 наурыз аралығында өтеді
Қазақстан мен Ресейдің Әуе шабуылына қарсы қорғаныс әскерлері бірлескен жоспарлы жаттығуларды өткізіп жатыр, деп хабарлайды Azattyq Rýhy ҚР Қорғаныс министрлігінің баспасөз қызметіне сілтеме жасап.
Жаттығудың мақсаты
Қазақстан Республикасы мен Ресей Федерациясының бірыңғай өңірлік әуе шабуылына қарсы қорғаныс жүйесінің іс-шаралар жоспарына сәйкес, дайындық жұмыстары 20 ақпан мен 10 наурыз аралығында өтеді.
Бұл шараның басты мақсаты — екі елдің кезекші күштерінің өзара іс-қимылын нығайту, жауынгерлік шеберлігін арттыру және әуе кеңістігін қорғауға дайындығын тексеру.
Әскери қызметкерлер алдағы бірнеше апта ішінде келесі маңызды міндеттерді пысықтайды:
- Ықтимал нысандарды дер кезінде тауып, оларды бақылауға алу;
- Күмәнді әуе кемелерін соңына дейін қадағалау;
- Әуе кеңістігін бұзушыларды ұстау;
- Тәртіп бұзған ұшақтарды белгіленген аэродромдарға қонуға мәжбүрлеу.
Қорғаныс ведомствосы азаматтар мен БАҚ өкілдерін тек ресми ақпарат көздеріне сенуге және негізсіз қауесет таратпауға шақырды.
Көп оқылған
