Балқашта көпқабатты үйдің бір бөлігі опырылып түсті: желіде қорқынышты апаттың видеосы тарап жатыр

Балқаш қаласында көпқабатты үйлердің бірінде көпқабатты үйдің бір бөлігі опырылып түсті, деп хабарлайды Azattyq Rýhy.

Оқиғаға байланысты Балқаш қаласының әкімдігі ресми пікір білдірді. Атқарушы органның мәліметінше, 19 ақпан күні сағат шамамен 08:10-да Қараменде би көшесі, 10 мекенжайында орналасқан тұрғын үйдің бұрын апатты деп танылып, бұзуға жатқызылған, қазіргі уақытта пайдаланылмайтын (тұрғын емес) кіреберісінің бір бөлігі құлады.

Қуанышқа орай, аталған подъезде ешкім тұрмаған. Зардап шеккендер жоқ.

«Хабарлаймыз, 2025 жылы көрсетілген подъезд Қазақстан Республикасының заңнамасына сәйкес жүргізілген техникалық қорытынды мен құрылыс сараптамасының негізінде апатты деп танылған. 5-подъезд тұрғындары алдын ала қоныс аударылып, пәтерлері тұруға жарамсыз деп танылғандықтан, заңда белгіленген тәртіппен тұрғын үйге мұқтаж азаматтар ретінде есепке қойылған. Қазіргі таңда тұрғындардың бір бөлігі баспанамен қамтамасыз етілді.

Құлау сәтінде қаза болғандар мен зардап шеккендер тіркелген жоқ. Ғимарат қоршауға алынып, кіруге шектеу қойылды, инженерлік коммуникациялар (электр, жылу, су жүйелері) белгіленген тәртіппен ажыратылды», – дейді әкімдік.

Белгілі болғандай, қазіргі уақытта құрылыс және өнеркәсіптік қауіпсіздік талаптарын сақтай отырып, 5-кіреберісті демонтаждау жұмыстары жүргізіліп жатыр.

«Демонтаж жұмысы кезеңінде бүкіл үйдің (шамамен 120 отбасы) тұрғындарын толық эвакуациялау ұйымдастырылды. Қалған кіреберістердің тұрғындарына Қазақстан Республикасының тұрғын үй заңнамасына сәйкес уақытша тұрғын үй беру мәселесі қарастырылуда.

Демонтаж жұмыстары аяқталғаннан кейін қалған 4 кіреберісте қосымша техникалық тексеру және құрылыс сараптамасы жүргізіледі. Олар тұруға жарамды және қауіпсіздік талаптарына сәйкес деп танылған жағдайда, тұрғындар өз пәтерлеріне қайта орала алады.

Алдағы уақытта қалған кіреберістердің конструкцияларын күшейту бойынша жұмыстарды жүргізуге арналған жобалық-сметалық құжаттама белгіленген тәртіппен әзірленетін болады», – деп хабарлады Балқаш қаласының әкімдігі.