Теңізде мұнай өндіру қайта басталды

Қазақстанның ең ірі мұнай кен орны — Теңізде өндірістік операциялар қайта жанданды. Энергетика министрлігінің хабарлауынша, бүгін таңда технологиялық қондырғылар іске қосылып, штаттық режимде жұмыс істей бастады, деп хабарлайды Azattyq Rýhy ведомствоның баспасөз қызметіне сілтеме жасап.

Іске қосу хронологиясы

Жедел штабтың мәліметінше, 31 қаңтар күні сағат 03:35-те алғашқы ұңғыма (ГЗУ-52) сәтті ашылды. Қазіргі уақытта өндіріс процесі кезең-кезеңімен қалпына келтірілуде.

Жұмысқа қазірдің өзінде 5 ұңғыма қосылды. «Теңізшевройл» техникалық қызметтері келесі топтық өлшеу қондырғысын (ГЗУ-53) іске қосуға дайындалып жатыр. Негізгі технологиялық қондырғылар іске қосылып, тұрақты жұмыс істеп тұр.

Королев кен орны мен Екінші буын зауыты

Айта кетерлігі, осы аптаның басында, яғни 26 қаңтарда Екінші буын зауыты (ЗВП) сәтті іске қосылған болатын. Бұл нысан қазіргі уақытта жұмыс істеп тұрған Королев кен орнынан алынатын шикізатпен қамтамасыз етілуде.

Өндіріс көлемін арттыру жүйе параметрлері тұрақталған сайын және технологиялық процестердің толық қауіпсіздігі қамтамасыз етілген жағдайда кезең-кезеңімен жүзеге асырылады.

Мемлекеттік бақылау

Жоспарлы қуаттылыққа тезірек шығу үшін Энергетика министрлігі мен «ҚазМұнайГаз» ҰК АҚ жоба операторына жан-жақты қолдау көрсетуде.

Қазіргі уақытта өндірістік нысандарда жұмысты үйлестіру үшін Энергетика вице-министрі Қайырхан Тұтқышбаев жүр. Министрлік атап өткендей, басты басымдық — өнеркәсіптік қауіпсіздіктің қатаң нормаларын сақтау.