Қосшыда сабақ үстінде 10 жасар қыз бала қайтыс болды

Ақмола облысына қарасты Қосшы қаласындағы қоғамдық мәдени-спорт кешенінде сабақ барысында 10 жасар қыз бала көз жұмды, деп хабарлайды Azattyq Rýhy.

Белгілі болғандай, марқұм бронхиалды демікпе диагнозымен диспансерлік есепте тұрған. Сабақ кезінде баланың жағдайы кенеттен нашарлап, жедел жәрдем шақырылған. Алайда бригада келгенге дейін жағдайы күрт ауырлап кеткен.

Көрсетілген медициналық көмектің нәтижесіне қарамастан, баланы аман алып қалу мүмкін болмады.

Қайғылы оқиғаға қатысты облыстық Полиция департаменті агенттік тілшісіне ресми пікір білдірді.

«Кәмелетке толмаған баланың қайтыс болу фактісі Қосшы қаласының полиция бөлімінде тіркелді. Қазіргі уақытта болған оқиғаның барлық мән-жайын анықтауға бағытталған тергеу іс-шаралары жүргізіліп жатыр.

Алдын ала мәліметтерге сәйкес, сабақ барысында кәмелетке толмаған баланың денсаулық жағдайы нашарлаған. Тексеру қорытындысы бойынша түпкілікті процессуалдық шешім қабылданады», – делінген Ақмола облысының Полиция департаменті хабарламасында.