«Ұлым момын»: Атырауда ерлі-зайыптының өліміне күдікті жігіттің анасы оның бес баласына қарап қалған

Атырау облысының полициясы Жангелдин ауылында ерлі-зайыптының өліміне қатысты іс бойынша күдіктіні іздестіріп жатыр. Көз жұмған зейнеткерлердің қызы мен ұлы әлі күнге дейін табылған жоқ. Кейбір деректерге сүйенсек, күдік күйеу баласына түскен. КТК телеарнасының тілшілері күдіктінің анасымен тілдескен, деп хабарлайды Azattyq Rýhy. 

Отбасылық трагедия болған Жангелдин ауылының халқы 66 жастағы Мақсот Қарабалин мен оның 64 жастағы жұбайы Нәсіп Өтешқалиеваны жер қойнына тапсырды. Зейнеткерлер қазан айынан бері хабар-ошарсыз кеткен, ал олардың мәйіттері екі күн бұрын ғана табылды. Қылмыскер құрбандарының денесін қораға көміп тастаған.

Отбасының түгел жоғалуымен қатар, қарт жұптың тағы бір қызы күйеуімен бірге елден кеткен. Осыдан кейін күдік зейнеткерлердің күйеу баласына түскен.

«Атырау облысында Жангелдин ауылының тұрғындарын өлтіру дерегі бойынша күдікті іздестіріліп жатыр. Қылмысқа күдікті Атырау облысы Махамбет ауданының 29 жастағы тұрғыны. Сондай-ақ басқа адамдардың қатысы бар-жоғы тексеріліп жатыр», - деді Атырау облыстық полиция департаменті криминалдық полиция басқармасы бастығының орынбасары Абай Жұмабаев.

Бас прокуратураның құқықтық статистика және арнайы есепке алу органдары порталында жарияланған бағдарламаға сәйкес, Атырау облысының полиция департаменті 8 қаңтарда 1996 жылы туған Сұлтан Сәрсемәлиевті іздеуге жариялаған.

Күдіктінің өзі мен жұбайының қайда екені белгісіз. Ерлі-зайыпты бес баласын әжесіне қалдырып кеткен. Әйелдің айтуынша, келіні науқас болған, соңғы уақытта балаларды ұлы өзі тәрбиелеген. Кейін ол әйелін емдеуге апаратынын айтқан.

Алайда анасы баласының қылмысқа қатысы бар екеніне сенбейтінін жеткізді.

«Мен ұлымды дұрыс тәрбиеледім, ол тәрбиелі, момын адам. Мен бұған сенбеймін, мүлде сенбеймін. Ол мұндай іске бармайды. Оның әкесі қатал, ұлы одан қорқады. Мұндайды жасауы мүмкін емес», - дейді Гүлнар Азмұқанова.

Қазір әйел бес немересіне қарап отыр. Үлкені 10 жаста, кішісі бір жаста ғана. Ата-аналарының қайда екенін білмейді, бірақ олардың қайта оралатынына сенімді. Балалардың жағдайы жергілікті білім бөлімі тарапынан бақылауға алынған.

«Қамқоршылық мәселесі барлық жағдай анықталғаннан кейін ғана қаралады. Қазір балаларға ата-әжесі қарайды. Біз бұл адамдарға сенеміз», - деді Махамбет аудандық білім бөлімінің қорғаншылық және қамқоршылық бөлімінің әдіскері Айтөре Әбенова.

Жангелдин ауылында бір отбасының жоғалғаны туралы арыз 25 желтоқсанда берілген. Екі күн бұрын қорадан зейнеткер ерлі-зайыптылардың мәйіті табылды. Ал күзде жоғалып кеткен 35 жастағы Мейрамгүл Қарабалина мен 33 жастағы Наурыз Мұқанғалиевтен әлі хабар жоқ. Полиция тергеуді жалғастырып жатыр.

Бұған дейін Атырау облысында Жангелдин ауылынан бір отбасының хабар-ошарсыз кеткені хабарланған еді. 2025 жылдың қазан айынан бері Мақсот Қарабалин, жұбайы Насип Өтешқалиева және олардың ересек екі баласы Мейрамгүл мен Наурыздың қайда екені белгісіз болған. Ресми арыз полицияға 2025 жылғы 25 желтоқсанда түскен.

Ауылдастардың айтуынша, алдымен ұлы Наурыз жоғалған. 2025 жылдың жазында ол Ақтау бағытына жұмысқа баратынын айтып кеткен, содан кейін байланыс үзілген. Қазан айында отбасының қалған мүшелері де дәрігерге барамыз деп ауылдан шығып кеткен. Қай қалаға, қай медициналық мекемеге барғаны белгісіз.

Отбасы кеткен соң, WhatsApp арқылы ұлының атынан барлық мал сатылып, түскен қаржы Мақсот Қарабалиннің жеке шотына аударылғаны айтылады. Сондай-ақ жоғалғандардың ұялы байланыс сигналдары Қазақстанның басқа өңірлерінде тіркелген.

Кейін бұл іс «Адам өлтіру» бабы бойынша тергеліп жатқаны белгілі болды. Іздеу жұмыстарына еліміздің барлық өңіріндегі полиция департаменттері тартылды. Барлық медициналық мекемелер, соның ішінде жекеменшік клиникалар да тексерілді.

6 қаңтар күні кешке Атырау облыстық полиция департаменті отбасының әкесі мен анасының мәйіті табылғанын хабарлады. Тергеу тағы екі жоғалған адамды іздеуді жалғастыруда. Қараша айында қаза тапқандардың екінші қызы көрші аудандағы жанармай бекетінде камераға түсіп қалған. Мәйіттер табылғаннан кейін тергеу марқұмдардың күйеу баласының қатысын тексеріп жатыр.

Атырау облысының полициясы 8 қаңтарда Жангелдин ауылы тұрғындарының өліміне күдіктіні ресми түрде іздеуге жариялады.