Қарағанды облысында аязды түні мал іздеуге шыққан ер адам жоғалып кетті

Қарағанды облысында 1953 жылы туған ер адамды іздестіру жұмысы жалғасып жатыр, деп хабарлайды Azattyq Rýhy облыстық Төтенше жағдайлар департаментінің баспасөз қызметіне сілтеме жасап.

Төтенше қызмет өкілдерінің мәліметінше, іздестіру жұмысы Шет ауданына қарасты Ағадыр кенті маңында жүргізіліп жатыр. Алдын ала мәлімет бойынша, 18 желтоқсанда ер адам Toyota Land Cruiser автокөлігімен мал іздеуге шығып, қайта оралмаған. Оның жоғалғаны туралы хабар 21 желтоқсан күні сағат 01:55-те Қарағанды облысының ТЖД-сіне түскен.

Іздестіру-құтқару операциясына Қарағанды облысының ТЖД күштері, Қазақстан Республикасы ТЖМ-нің 52859 әскери бөлімі, полиция департаментінің қызметкерлері, сондай-ақ еріктілер мен жоғалған азаматтың туыстары тартылған.

Іздеу барысында екі ұшқышсыз ұшу аппараты, Starlink спутниктік байланыс жабдығы, сондай-ақ «Қазавиақұтқару» АҚ-ның әуе кемесі пайдаланылуда. Жұмыстар ықтимал бағыттар мен аумақтарды тексере отырып, тәулік бойы жүргізілуде.

«Қарағанды облысының ТЖД жоғалған азаматтың қайда екені туралы қандай да бір ақпаратқа ие тұрғындарды 112 нөміріне хабарласуға шақырады», – делінген хабарламада.