Алматы облысы әкімінің орынбасары мүгедек жандарға қатысты айтқан сөзі үшін кешірім сұрады

Алматы облысы әкімінің бірінші орынбасары Қанат Есболатов Талғарда өткен денсаулық сақтау министрімен кездесуде мүгедек жандарға қатысты айтқан сөзі үшін көпшіліктен кешірім сұрады, деп хабарлайды Azattyq Rýhy.

Видео әлеуметтік желіде тарап, қоғамның сынына ұшырады. Жиын барысында Қанат Есболатов:

«Давайте уважать инвалидов, их и так Бог наказал», – деген тіркес қолданған.

Шенеунік кейінірек видеодағы сөзіне түсініктеме берді. Ол денсаулық сақтау министрімен Талғарда өткен кездесуге адам көп жиналғанын атап өтті. Әрқайсысы өзекті мәселе көтеріп, сұрақ қоюға асыққан. Сондықтан кезек те үлкен болды.

«Регламент бойынша кездесуге екі сағат бөлінген еді. Бірақ сұрақтың көп болуына байланысты жиын шамамен 4 сағатқа созылды. Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. «Құдай үлкен сынақ берген» деп айтпақ болғанмын. Айтқан сөзім көпшіліктің көңіліне, тіпті намысына тигенін де түсіндім. Осы үшін шын ниетіммен кешірім сұраймын», - деп жазды Есболатов.

Ол сондай-ақ ауқымды іс-шараларда алдымен егде жастағы тұрғындарға және мүмкіндігі шектеулі азаматтарға жол беру маңызды екенін атап өтті.

«Қай жиын болмасын, оларды көп күттірмей, кезексіз тыңдау дұрыс әрі адамгершілікке сай деп есептеймін. Сіздердің пікірлеріңіз бен реакцияларыңыз мен үшін өте маңызды. Жиында көтерілген әр сұрақты әкімдік пен министрлік назарға алды, көпшілігіне сол жерде жауап берілді. Қосымша пысықтауды қажет ететін мәселелер хаттамаға енгізіліп, бақылауға алынды. Министрлікпен бірге бұл бағыттағы жұмысты жалғастырамыз», - деп түйіндеді әкім орынбасары.