Денсаулық сақтау министрлігі ана өлімінің негізгі себептерін атады
Бүгінгі таңда әйелдерді жүктілікке дейінгі дайындықпен қамту деңгейі 46,1% құрайды
Қазақстанда ана денсаулығын нығайту, перинаталдық нәтижелерді жақсарту және жүктілікті жоспарлауға өркениетті көзқарасты ілгерілету мақсатында «Аналар саулығы» арнайы бағдарламасы іске асырылуда, деп хабарлайды Azattyq Rýhy Денсаулық сақтау министрлігіне сілтеме жасап.
Негізгі қауіптер
Денсаулық сақтау министрлігінің мәліметінше, ана өлімінің негізгі себептері – әйелдердегі экстрагениталдық аурулар (жыныс мүшелеріне қатысы жоқ аурулар) және жүктілікке дейінгі дайындықпен жеткіліксіз қамту.
Сала сарапшылары жүктілікті жауапкершілікпен жоспарлау болашақ ана мен баланың денсаулығына төнетін қауіптерді айтарлықтай төмендететінін айтады.
Тегін тексеріс
«Аналар саулығы» бағдарламасы аясында елімізде алғаш рет бала көтеруді жоспарлап жүрген әйелдер үшін жаңа мүмкіндіктер енгізілді.
Енді олар Міндетті әлеуметтік медициналық сақтандыру (МӘМС) шеңберінде 12 базалық тексеруден тегін өте алады.
Ведомство мәлімдегендей, осы тексерулер барысында қандай да бір патологиялар анықталса, әйелдерге сауықтыру бағдарламалары ұсынылады.
Бүгінгі таңда әйелдерді жүктілікке дейінгі дайындықпен қамту деңгейі 46,1% құрайды.
ДСМ осы көрсеткішті арттыру және әйелдер арасында жүктілікті саналы түрде жоспарлаудың маңыздылығын насихаттау бойынша жұмыстарды жалғастыруда.
