Шетелден кіретін мәдени құндылықтың құны 1 млн теңгеден асса, бақыланады
Қазір бұл операциялардың шегі – 45 млн теңге
Қазақстанда мәдени құндылықтарды елге әкелу не әкету жөніндегі операциялардың шегін 45 млн теңгеден 1 млн теңгеге дейін төмендету ұсынылып отыр, деп хабарлайды Azattyq Rýhy.
Бұл норма «Кейбір заңнамалық актілерге қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл мәселелері бойынша өзгерістер енгізу туралы» заң жобасында қаралған.
Қаржы мониторингі агенттігі төрағасының орынбасары Жеңіс Елемесовтің айтуынша, ақшамен және өзге мүлікпен жекелеген операциялар жөніндегі шектер қайта қаралады.
«Мәдени құндылықтарды қолма-қол ақшамен сатып алу (сату), мәдени құндылықтарды Қазақстанға әкелу не Қазақстаннан әкету жөніндегі операциялардың шегін 45 млн теңгеден 1 млн теңгеге дейін төмендету ұсынылады», - деді ол Мәжілістің жалпы отырысында.
Сонымен қатар, сомасы 5 млн теңгеге тең немесе одан асатын цифрлық активтермен жасалатын операциялар да енді қаржылық мониторингке жатады.
