«Теңізшевройл» қызметкерлерінің бір бөлігін мәжбүрлі демалысқа жіберді

«Теңізшевройл» қызметкерлерінің бір бөлігін мәжбүрлі демалысқа жіберді, деп хабарлайды Ақжайық.

Бүгін Whatsapp мессенджері арқылы Теңіз кенішінде жыл соңына дейін тікелей өндіріске қатысы жоқ кейбір жұмыстардың тоқтатылғаны, ал жұмыс берушіге байланысты емес себептермен тоқтатылған уақыт үшін орташа жалақының 50%-ы мөлшерінде төленетіндігі туралы ТШО-ның бас директоры Имер БОННЕР қол қойған құжат таралды.

 «Иә, «Теңізшевройлдың» бірқатар қызметкерлеріне қатысты осындай бұйрық бар. COVID-19 пандемиясына қарсы іс-қимыл аясында ТШО кейбір жобаларды уақытша тоқтатты. Жобаға тартылған жұмысшылар жалақыны ұжымдық шарттың және ҚР еңбек заңнамасының талаптарына сәйкес алады. Бұл бұйрық «Теңізшевройл» ЖШС қызметкерлерінің шамамен 8% -на қатысты. Қазіргі уақытта ТШО-ның негізгі өндірістік қызметі бұрынғыша үзіліссіз жүзеге асырылуда», - деп жауап берген компанияның баспасөз қызметі редакция сауалына.