Солтүстік Қазақстанда күйеуін өлтірген әйел сотталды

Петропавл тұрғыны түрмеге қалай түскенін айтып берді. Әйел күйеуінің соққысынан қорғанып, оны өлтіргені үшін тоғыз жылға бас бостандығынан айырылды, деп хабарлайды Azattyq Rýhy Солтүстік Қазақстан облысы полиция департаментінің баспасөз қызметіне сілтеме жасап.

Сол күні ол жұмыстан үйге жүгіріп келген, себебі күйеуі телефонға жауап бермеген. Әйел жұмысқа кеткенде оның қасында бір жасар қызы қалған.

Үйге келгенде күйеуінің бірге ішімдік ішетін достарын көрген, ал өзі ұйықтап қалған, бала мас еркектердің арасында еденде жалаңаш отырған. Ол мастарды үйден қуған, бірақ күйеуі оянып кетіп, оған жұдырық ала жүгіреді. Әйел өзін қорғамақ болып, қолына пышақ алып, оны пышақтап тастаған. Күйеуі алған жарақатынан жедел жәрдем келгенше қайтыс болды.

Тәртіп сақшылары егер ол үнсіз қалмағанда, дер кезінде көмекке жүгінгенде немесе ондай қарым-қатынасты ертерек үзгенде бәрі басқаша болуы мүмкін екенін атап өтті.

«Тұрмыстық зорлық-зомбылық жеке мәселе емес, бұл – адам құқығын бұзу және жалпы ұлт денсаулығына қауіп төндіру. Әрбір үнсіздік, агрессияны ақтау жаңа қайғылы оқиғаларға әкеледі», - дейді Солтүстік Қазақстан облысы ПД жергілікті полиция қызметінің басшысы Әлібек Ғабдуллин.

Бүгінгі таңда жәбірленушілерді қорғау бойынша бірқатар шара қабылдануда: заңдар мен құқықтық қолдау тетіктері жетілдіріліп жатыр, сенім телефондары мен дағдарыс орталықтары жұмыс істеп тұр.

«Бірақ мемлекеттік шаралардың жалғыз өзі жеткіліксіз. Бізге «Зорлық-зомбылыққа жол жоқ!» деп айту үшін әрқайсымыздың ерік-жігеріміз қажет. Агрессияға төзбейтін қоғам ғана күшті бола алады», - деп толықтырады Ғабдуллин.

Полицей адамдарды зорлық-зомбылыққа төзбеуге шақырады.  

«Азаматтардың өздері «жоқ» демейінше жағдайды өзгерту мүмкін емес. Егер сіз зорлық-зомбылықтың куәгері немесе құрбаны болсаңыз, үндемей қалмаңыз. Енжарлық агрессорды күшейтеді, ал дер кезінде көмек қолын созу адам өмірін сақтап қалуы мүмкін», - деп түйіндеді полиция басшысы.