Астанадағы автобус апаты: әкімдік жүргізушіге қатысты тың мәлімет жариялады

Астана әкімінің баспасөз қызметі 8 жасар қызды өмір бойына мүгедек еткен көлік апаты туралы мәлімдеме жасады,деп хабарлайды Azattyq Rýhy.

«Автобус жүргізушісінің жолаушылар көлігін жүргізу саласында жалпы еңбек өтілі 15 жылдан асады, ал автопаркте 2020 жылдан бері жұмыс істейді. Оқиға болған күні ол алдын ала міндетті медициналық тексерістен өтіп, жұмысқа жіберілген. Жұмысқа демалыстан кейінгі алғашқы күні шыққан. Автобус 2024 жылғы, желіге шыққан сәтте техникалық тұрғыдан жарамды күйде болған», - делінген ресми хабарламада.

Аталған факт бойынша қалалық полиция департаменті қылмыстық іс қозғады. Жан-жақты тексеру жүргізілуде, барлық мән-жай анықталып жатыр.

Әкімдіктің мәліметінше, автобус жүргізушілері мен көлік күн сайын жолға шығар алдында тексерістен өтеді.

Сонымен қатар, автобустар желіге шықпас алдында автобус паркінің жауапты қызметкерлері күн сайын мынадай жұмыс жүргізеді:

• көліктің көзге көрінетін тұстағы зақымдарын тексеру;
• жүргізушіге қажет жиынтықтың (өрт сөндіргіш, алғашқы медициналық көмек қобдишасы, сүйреткіш арқан, домкрат, апаттық тоқтау белгісі) болуын тексеру;
• негізгі тораптар, жүйелер мен механизмдердің жұмыс істеуін тексеру;
• жүргізушілердің медициналық тексерісі (қан қысымын өлшеу, дене қызуын өлшеу және т.б.)», - делінген мәлімдемеде.

Қазіргі күні қоғамдық көліктің бағанаға соғуы салдарынан үш жолаушы ауруханада жатыр. Оның бірі – 2017 жылы туған қыз балаға ота жасалып, екі аяғы ампутацияланды. Тағы екі адам апаттан қатты зардап шеккен.

Қала әкімдігі зардап шеккендерге медициналық және психологиялық көмек көрсетіп жатыр, сондай-ақ материалдық және басқа да қажетті қосымша көмек көрсетілетін болады. Зардап шеккен жолаушыларға қолданыстағы заңнамаға сәйкес, медициналық және сақтандыру сараптамалары жүргізілгеннен кейін ақшалай өтемақы төленеді.