Алматыда болған төбелес кезінде қару қолданды деген күдікпен тағы бір жігіт ұсталды

Алмалы аудандық полиция басқармасының өкілдері төбелес кезінде қару қолданды деген күдікпен тағы бір жігітті ұстады, деп хабарлайды Polisia.kz.

«Күдікті – 1994 жылы туған С. есімді азамат. Ол қарсыласы 37 жастағы Ж. есімді ер адамның аяғына пышақ сұққан. Содан соң қылмыс орнынан қашып кеткен. ҚР Қылмыстық іс жүргізу кодексінің 128-бабына сәйкес, күдікті ПД-ның уақытша ұстау изоляторына қамалды. Қазір бұл оқиға ҚР Қылмыстық кодексінің 293-бабы 3-бөлігі бойынша тергеліп жатыр, - дейді Алмалы аудандық Полиция басқармасының бастығы Есен Ысқақов.

Еске салайық, 3 маусым күні кафеден шыққан алматылықтар арасында төбелес болған. Төбелес кезінде пышақ пен травматикалық қару қолданылған. Салдарынан екі адам жарақат алды, оның бірі - көшеде кетіп бара жатқан кездейсоқ жолаушы.