Пара алған судья сотталмайтын болды: Бас прокуратураның шешімі шықты

Бас прокуратура 1,5 млн теңге пара алған судья Руслан Жұмағұловпен процессуалды келісімге келді, деп хабарлайды Azattyq Rýhy.

Орал аптағы басылымының жазуынша, судья Руслан Жұмағұлов пен адвокат Нұржігіт Фазылғалиев ҚК «Алаяқтық, яғни бөтеннің мүлкін жымқыру, алдау немесе сенімді теріс пайдалану жолымен бөтен мүлiкке құқықты иемдену» 190-бабы бойынша айыпталған. Олар кінәсін мойындап, процессуалды келісімге келіп, жазалары жеңілдеп отыр. Енді олар 3,9 млн теңге айыппұл төлеп, түрмеге жабылу жазасынан құтылуы мүмкін. Айыптау актісі сотқа жөнелтілді, іс қысқартылған тәртіппен қаралады.

БҚО облыстық соты Жұмағұлов пен Фазылғалиевтің сот отырысы қайда өтетінін хабарлайды.

Айта кетейік, 2024 жылы 5 қарашада Орал қалалық сотының төрағасы Руслан Жұмағұлов пен адвокаттар Әділ Ахмолдин және Нұржігіт Фазылғалиев ұсталған. Кейін Әділ Ахмолдинге куәгер статусы беріліп, босатылды. Тергеу органдарының дерегінше, Нұржігіт Фазылғалиев айыпталған азаматқа оң шешім шығарып беруі үшін Руслан Жұмағұловқа 1,5 млн теңге пара берген.

Орал қалалық сотының төрағасы уақытша тергеу изоляторына қамалып, екі аптадан кейін үй қамаққа ауыстырылды.

Руслан Жұмағұлов 2001-2011 жылдар аралығында прокурор, 2011-2015 жылдар аралығында адвокат болып жұмыс істеген. 2015 жылдан бастап судья, 2019 жылдан бастап Орал қалалық сотының төрағасы болып тағайындалған.