Оралда 13 жастағы қызды зорлағандардың сот үкімі қайта қаралды

Батыс Қазақстан облысының прокуратурасы бес сотталушыға, оның ішінде кәмелетке толмаған төрт азаматқа қатысты шығарылған бірінші сатыдағы сот үкіміне апелляциялық өтініш берген, деп хабарлайды Azattyq Rýhy. 

Оларды бұзақылық жасау, көлік айдап кету, бір көліктен бір миллион теңге, екіншісінен ұялы телефон ұрлау, сонымен қатар 13 жастағы оқушы қызды топтық зорлау айыбы тағылған.

Сотталушылардың кінәсі сотқа дейінгі тергеу барысында дәлелденген.

5 маусымда сот олардың біреуіне 20 жыл бас бостандығынан айыру жазасын тағайындады, үш кәмелетке толмағандар жеті жыл алты ай, тағы біреуі сегіз жыл алды.

18 қазанда Батыс Қазақстан облыстық сотының қылмыстық істер жөніндегі сот алқасының қаулысымен прокурордың апелляциялық өтінішхаты бойынша үш кәмелетке толмаған сотталушыға қатысты сот үкімі өзгертілді.

Олардың екеуіне мерзімді 7 жыл 7 айға дейін, тағы біреуіне 8 жыл 1 айға дейін ұзартты. Қалған бөлігінде сот үкімі өзгеріссіз қалдырылды.

«Апелляциялық қарау барысында алқа бірінші сатыдағы соттың материалдық құқық нормаларын дұрыс қолданбағанын көрді, осыған байланысты жаза мерзімдерін ұзартты», — делінген хабарламада.

Сот үкімі заңды күшіне енді.​​​​​​​​​