«Жол үстіндегі көкпар»: Алматы облысында ат спортын ұйымдастырғандар жауапкершілікке тартылды

Алматы облысының полицейлері жолдың жүріс бөлігінде көкпар ұйымдастырған ер адамдарды жауапкершілікке тартты, деп хабарлайды Azattyq Rýhy.

Облыстық полиция департаментінің мәліметінше, Жамбыл ауданының Қарғалы ауылындағы бір топ шабандоздың жол қозғалысы ережелерін өрескел бұзу фактісі әлеуметтік желілердің мониторингі кезінде анықталған.

«Құқық бұзушыларды аудандық полиция қызметкерлері анықтап, полиция бөліміне жеткізді. Жаяу жүргіншілер мен жол қозғалысының өзге де қатысушылары қозғалыс ережелерін бұзғаны үшін ер адамдар әкімшілік жауапкершілікке тартылды», - делінген хабарламада.

Ведомствода құқық қорғау органдары әлеуметтік желілерге, оның ішінде құқық бұзушылықтарды анықтау және уақтылы жолын кесу тұрғысынан тұрақты мониторинг жүргізетінін атап өтті. Полицейлер қазақстандықтарды қоғамдық тәртіпті бұзбауға және жол қозғалысы мен жол қауіпсіздігі ережелерін қатаң сақтауға шақырды.