Алматыда жеке тұрғын үйден шыққан өрт 200 шаршы метр аумаққа тарады

Түс кезінде төтенше жағдайлар департаментіне Шығыс айналма жолына жақын тұрған  баспананың жанып жатқаны туралы хабарлама келіп түскен. Тілсіз жау 200 шаршы метр аумақты шарпыды, деп хабарлайды Azattyq Ruhy КТК телеарнасына сілтеме жасап.

Қызыл жалын  алдымен Шоқай көшесіндегі қосалқы ғимараттың шатырынан тұтатып, кейін Орынбор көшесінде орналасқан екі қабатты жеке тұрғын үй шатырына таралып жалын лезде шарпыған. Төтеншеліктер өртті жарты сағатта сөндірді.  Ал жанған үйдің артынан 37 газ баллоны табылып, дер кезінде шығарылды. Зардап шеккендер жоқ.  Өртпен күреске32 маман мен 10 техника жұмылдырылды.

«Үйдің жанып жатқан ошағы батыс бағыттан басталып, шығыс бағытта және де оңтүстік бағытта таралғанын байқадым. Орынбор 43 үйі, №29 үйдің артында 37 газ баллоны табылды. Жарылыс қаупінің алдын алдық», - деді Азаматтық қорғау гвардиясының бастығы Айбек Байысбеков.