Алматы арқылы Ресей мен Еуропаға заңсыз өтпек болған ауғанстандықтар ұсталды – ҰҚК
Заңсыз көші-қон арнасының жолы кесілді
Қазақстан аумағы арқылы Ресейге және одан ары Еуропа елдеріне заңсыз өтпек болған Ауғанстан азаматтарының жолы кесілді, деп хабарлайды Azattyq Ruhy.
Заңсыз көші-қон арнасын ҰҚК ШҚ «Алматы» шекаралық бақылау басқармасы ҰҚК Алматы қаласы бойынша департаментімен бірлесе, прокуратура органдарының үйлестіруімен анықтады.
«16 наурызда лауазымды тұлғаға 5 мың АҚШ доллары көлемінде пара беру әрекеті кезінде Ауғанстанның 4 азаматы ұсталды. Тергеу материалдарына сәйкес, бұл қаражат шетелдіктерді Испания мен Португалияның жалған төлқұжаттары бойынша Алматы қаласының халықаралық әуежайы арқылы тасымалдауды ұйымдастыруға арналған», - делінген ҰҚК Шекара қызметінің хабарламасында.
Қылмыстық кодекстің 394-бабының 1-бөлігінде және 367-бабында көзделген қылмыс белгілері бойынша сотқа дейінгі тергеп-тексеру жүргізілуде.
Соттың санкциясымен ұсталған адамдарға қамауда ұстау түріндегі бұлтартпау шарасы қолданылды.
Қылмыстық-процестік кодекстің 201-бабының 1-бөлігіне сәйкес өзге де ақпарат жария етуге жатпайды.
