Өзбекстанда кен орнында болған апаттан 3 шетелдік көз жұмды
Тағы 29 адам ауруханада жатыр
Өзбекстанда Алмалық тау-кен металлургия комбинатының мыс өңдеу зауытында темір конструкциялар құлап, 3 жұмысшы қаза тауып, 29 адам ауруханаға түсті, деп хабарлайды Azattyq Ruhy Gazeta.uz басылымына сілтеме жасап.
Олардың бәрі Үндістан азаматтары болып шықты.
Өзбекстан ТЖМ мәліметтері бойынша, тоқтаусыз қалың қар жауып, жел тұрған себепті 20 ақпанда сағат 8:00 шамасында Enter Engineering компаниясының металл дайындау цехында уақытша объектінің шатыры құлап түскен.
Нәтижесінде құрылыс компаниясының 32 қызметкері жарақат алды. Олардың үшеуі сол жерде қайтыс болды, 29-ы жарақаттанып, ауруханаға түсті.
«Жауапты ведомстволар оқиғаның мән-жайын зерттеу, оны дереу жою және зардап шеккендерге көмек көрсету мақсатында жұмыс тобын құрды», - делінген хабарламада.
21 ақпанда елдің Бас прокуратурасы «Қылмыстық кодекстің 257-бабы 2-бөлігінің» а, б тармақтары бойынша қылмыстық іс қозғалғанын мәлімдеді.
Жауапты адамдар 2 жылдан 5 жылға дейін бас бостандығынан айырылуы мүмкін.
