Қостанайда полиция 5 пәтер ұрлығына қатысы бар азаматты құрықтады

Күдікті азамат қазіргі уақытта уақытша ұстау изоляторына қамауға алынды. 45 жастағы қылмыскер бір айдың ішінде тұрғын үйден 5 ұрлық жасады, деп хабарлайды Azattyq Ruhy Polisia.kz-ке сілтеме жасап.

Ол тұрғын үйлерге есік пен терезелерді бұзып кірген. Ол көбіне алтын бұйымдар мен компьютерлік техникаларды алған. Ол облыс орталығында және Тобыл қаласында өз пиғылын іске асырған. Шығын көлемі 1 млн теңгеден асады.

«Біз оны жедел-іздестіру іс-шараларын өткізу барысында ұстадық. Ұстау барысында онда ұрланған ноутбук болған. Ұрлық фактілері бойынша сотқа дейінгі тергеп-тексеру басталды. Жалпы алғанда, ол 7 жылға дейін бас бостандығынан айырылып, мүлкі тәркіленуі мүмкін», – деді Қостанай қаласы ПБ криминалдық полиция бөлімінің аға жедел уәкілі Аскар Мусин.

Полиция азаматтардан бейнебақылау камераларын, сондай-ақ күзет дабыл құралдарын орнату арқылы өз мүліктерін сақтау бойынша шаралар қабылдауды сұрайды.