Майқайыңдағы апат: құтқарушылардың заттары мен автобустың шанағы табылды

«Майқайың-алтын» АҚ тау-кен ауданындағы опырылған жерден құтқарушылардың жұмыс құжаттары мен автобустың шанақ бөлшегі табылды, деп хабарлайды Azattyq Ruhy.

Павлодар облысырың әкімі Асайын Байхановтың хабарлауынша, автобустың болжамды орналасқан жеріне арнайы техниканың кіруі үшін өткелді тереңдету жұмыстары жалғасуда. Осы уақытқа дейін барлығы 200 мың тоннадан астам топырақ пен тау жыныстары шығарылған.

«16 қаңтарда сағат 14.45-те «Майқайың-алтын» АҚ аумағындағы опырылған шұңқырдың түбіне шағын көлемді экскаватор түсірілді. Жұмыстар асқан сақтықпен және шұңқырдың бүйір қабырғаларының құлау қаупінің сақталуына байланысты барлық қауіпсіздік шараларын сақтай отырып жүргізілуде.

Жұмыстарды жүргізу кезінде жұмыс құжаттатары және жол-сапар журналы бар құтқарушылардың сөмкесі, сондай-ақ, мемлекеттік тіркеу нөмірі бар автобустың шанақ бөлшегі табылды. Іздестіру жалғасуда.

Автобустың болжамды орналасқан жеріне дейінгі топырақты қазып алу міндеті қойылған шағын экскаватордың жұмысы аяқталғаннан кейін мамандар оны жоғары көтеру жұмыстарын бастайды. Біз бұл жұмыстарды бүгін және ертең аяқтаймыз деп үміттенеміз», - деп жазды өңір басшысы желідегі парақшасында.   

Іздестіру жұмыстарына барлығы 141 адам, 50 бірлік техника, 1 кинологиялық есеп және 2 бірлік дрон жұмылдырылған.

Тақырыпқа орай: Майқайың кенішінде құлаған автобус табылды: оны шығару жолдары қарастырылып жатыр

Естеріңізге сала кетейік, жұмысы тоқтатылған «Майқайың-алтын» шахтасының маңында автоубс жер астына құлап кеткен. Алдын ала болжам бойынша опырылған жердің ұзындығы 150-200 метр, ені 500 метр, тереңдігі 150 метр. Автобуста төрт адам болған, олардың екеуі 4 қаңтарда түстен кейін табылды. Іздеу жұмыстарына 134 адам, 37 машина, үш кинологиялық есеп және екі дрон жұмылдырылды.