«Артынша көпіршіктер пайда болды»: Ақтауда баланы күйдірген күтуші жұмыстан кетті
Балабақша басшылығы «су температурасының өзгеруіне байланысты» баланы күйдіріп алғандарын мойындады
Ақтау балабақшаларының бірінде гигиеналық процедуралар кезінде қыз бала зардап шекті. Мекеме басшылығының айтуынша, баланы оңбай күйдіріп алғандарын бір сағаттан кейін бір-ақ байқаған. Алайда жедел жәрдемге емес, тек баланың ата-анасына ғана хабарласқан, деп хабарлайды Azattyq Ruhy агенттігі Ladа басылымына сілтеме жасап.
Оқиға Bala Land балабақшасында болған. Мекеме басшылығының хабарлауынша, баланы жуындырған жауапты күтуші оқиға болған күні жұмыстан шығарылған.
«Медбике мен тәрбиеші дереу шұғыл медициналық көмек көрсетті. Баланың ата-анасымен байланысып, жағдай туралы егжей-тегжейлі хабарлады. Баланың денесі қызарып кеткен, ал, жалпы жағдайы қанағаттанарлық болды. Алайда бір сағаттан кейін көпіршіктер пайда болып, баланың денесі оңбай күйіп қалғаны мәлім болды. Біз бұл жағдай үшін қатты өкінеміз, қателігімізді мойындаймыз және осы оқиға үшін толық жауап береміз. Сондай-ақ кез келген қосымша ақпарат беруге және баланы емдеу кезінде ата-анасына қажет болуы мүмкін көмек көрсетуге дайынбыз. Балабақша басшылығы баланы емдеуге жұмсалған барлық шығынды өтеуге дайын», - деді меңгеруші.
Бұл салғырттық салдарынан 2 жас 3 айлық қыз баланың денесінің 7%-ын күйік шалды.
«Сағат 16:00 шамасында «Bala Land» балабақшасының меңгерушісі қоңырау шалып, менің баламның ыстық судан аздап күйіп қалғанын хабарлады. Сағат 18:00-де жұбайым баланы алып кетуге барды. Сол кезде шошып кеттік. Баламның беліне дейін күйіп қалған. Сағат 19:00 шамасында, үйге жеткенде, дереу жедел жәрдем шақырдық. Травматолог жарақаттың II дәрежелі термиялық күйік екенін анықтады. Біз полицияға арыз жаздық, оқиғаға жауаптылар жазаланады деп үміттенеміз», - деп жазды баланың анасы әлеуметтік желіде.
Қалалық білім бөлімі болса, аталған мекеменің жекеменшік балабақша екенін жазды.
«Қазіргі уақытта балабақша басшылығына тиісті шаралар қабылдау туралы ескерту берілді. Директордың ақпараты бойынша ұжыммен түсіндірме әңгіме өткізілді. Сондай-ақ тиісті тәртіптік шараларды қабылдау бойынша жұмыстар жүргізіліп жатыр»,- деп хабарлады бөлімнің баспасөз қызметі.
