TikTok-қа жарияланған видео арқылы ақтаулық жүргізуші ұсталды

Ақтауда жол ережелерін бірнеше рет бұзған жүргізуші әлеуметтік желіге жарияланған видеоның арқасында ұсталды, деп хабарлайды Azattyq Ruhy.

Видеодан жүргізушінің бірнеше рет қос тұтас сызықты кесіп, жолдың қарама-қарсы бағытына шығып кетіп отырғанын, онымен қоймай, жылдамдықты белгіленген шектеуден асыра жүргізгенін көруге болады. Оның бұл әрекетін жолаушы видеоға түсіріп отырған. Мұндай құқықбұзушылық үшін жүргізуші куәлігінен айыру жазасы қарастырылған.  

Маңғыстау облыстық ПД мәліметінше, құқық бұзған жүргізуші әлеуметтік желілерге мониторинг жүргізу барысында анықталған.

«Лада 217050» автокөлігінің қарсы бағытқа шығып, жол қозғалысы ережелерін өрескел бұзған деректері көрсетілген бірнеше бейнеролик жарияланды. Патрульдік полиция батальоны қызметкерлері жүргізушінің жеке басын анықтады», - делінген хабарламада.

Белгілі болғандай, 20 жастағы құқық бұзушыға ҚР ӘҚБтК-тің 596, 590, 606, 595, 593-баптары бойынша бес әкімшілік хаттама жасақталды.

Автокөлік айыптұраққа қойылды.