Астанада суға батып кете жаздаған баланы кездейсоқ әйел полиция қызметкері құтқарып қалды

Елордадағы қоғамдық бассейндердің бірінде кішкентай бала суға батып кете жаздады. Абырой болғанда сондағыларды бірі дер кезінде көмекке жүгіріп, баланың өмірін сақтап қалды, деп хабарлайды Azattyq Ruhy Polisia.kz сайтына сілтеме жасап.

Видеодан суда ес-түссіз жатқан баланы құтқарушы қыздың шығарып жатқанын байқауға болады. Кейін оны ер адам жерге көтеріп жатқызады. Сол сәтте көмекке демалушы әйелдердің бірі келеді. Ол шебер қимылдармен жүрек-өкпе реанимациясын жасап, баланың тынысын қайтарды.

«Жедел жәрдем қызметі келгеннен кейін бассейн қызметкерлері баланы дәрігерлерге тапсырды. Қазір оның өмірі мен денсаулығына қауіп төніп тұрған жоқ. Ата-анасы баланы құтқаруға қатысқандардың барлығына алғыстарын білдірді. Белгілі болғандай, алғашқы медициналық көмек көрсеткен әйелдің есімі Назым Шәріпова. Ол «Есіл» ауданының полиция басқармасында анықтаушы болып жұмыс істейді. Сол күні полицей әйел отбасымен бірге демалыста болған. Ол құтқару кезінде балаға зақым келтірмеу үшін ерекше сақтықпен қимылдаған», - делінген хабарламада.