Астанада көпірден секірмек болған әйелдің мұндай әрекетке неліктен барғаны анықталды
Ол осы әрекеті арқылы сот үкімімен келіспейтінін көрсетпекші болған
Бүгін Астанада Министрліктер үйі маңындағы көпірден секірмек болған әйелдің әрекетіне қатысты елордалық ПД түсініктеме берді, деп хабарлайды Azattyq Rýhy.
«Мән-жайды анықтау барысында әйел бұл әрекетімен кәмелетке толмағандардың істері жөніндегі мамандандырылған ауданаралық сотының үкімімен келіспейтінін көрсетпекші болған. Биыл 6 сәуірде сот органы ҚР Қылмыстық кодекстің 191-бабының 2-бөлігі (Тонау) және 192-бабының 3-бөлігі (Қарақшылық) бойынша соттаған кәмелеттік жасқа толмағандардың бірі оның ұлы екені анықталды. Сонымен қатар, қоғамдық тәртіпті бұзушыға қатысты Әкімшілік құқық бұзушылық кодексінің 434-бабы бойынша (Ұсақ бұзақылық) әкімшілік хаттама толтырылды», - делінген ПД хабарламасында.
Еске сала кетейік, бүгін 12:20 шамасында елордалық әйел Астанада Министрліктер үйі маңындағы көпірден секірмек болды.
