Шығыс Қазақстанда 100-ден астам адам қатты жел салдарынан дала өртін сөндіре алмай жатыр
Алдын ала дерек бойынша өрт аумағы – 15 гектар
Шығыс Қазақстан облысында 100-ден астам адам қатты жел салдарынан дала өртін ауыздықтай алмай жатыр, деп хабарлайды Azattyq Rýhy ШҚО Төтенше жағдайлар департаментінің баспасөз қызметіне сілтеме жасап.
Департамент мәліметіне сүйенсек, 14 маусымда түнде Алтай ауданы Северное ауылынан 7 шақырым қашықтықтағы жетуі қиын таулы жерден өрт шыққан. Тілсіз жау шөп пен бұталарды шарпыды.
Сағат 06:25-те 3 гектарға жайылған от өшірілді. Алайда сағат 11.00 шамасында Северное ауылынан 10 шақырымдай жерде қайтадан өрт шықты. Өртті өшіруге жетуі қиын таулы жер мен бағытын үнемі өзгертететін жылдамдығы секундына 20 метрдей қатты жел кедергі келтіріп отыр.
«Қазіргі уақытта сол жерге облыстық ТЖД қызметкерлері, орманшылар және жергілікті атқарушы орган өкілдерінен 102 адам және 7 техника жұмылдырылған. Жеке құрамды жану орнына жеткізу үшін МИ-8 АП тікұшағы да тартылды. Алдын ала дерек бойынша өрт аумағы – 15 гектар. Елді мекендерге қауіп төніп тұрған жоқ», - делінген хабарламада.
