Өскеменде есірткі қабылдап көлік тізгініне отырған зейнеткер ұсталды

Өскемен қаласының полицейлері есірткі қабылдап көлік тізгініне отырған зейнеткерді ұстады. Бұл туралы  ШҚО Полиция департаментінің баспасөз қызметі мәлім етті, деп хабарлайды Azattyq Rýhy.

Департаменттің мәліметінше, тәртіп сақшылары Гагарин бульвары көшесінде патрульдеу кезінде «Porsche Cayenne» маркалы көлікті байқаған. Жүргізуші жолдағы жолақтан қарсы бағытқа қайта-қайта шығып, жылдамдықты біресе арттырып, біресе төмендеткен.

«Полицейлер жол жүрісі қағидаларын бұзған көлік жүргізушісін тоқтатты. Сөйлесу кезінде полиция қызметкерлері одан айқын мас күйдегі адамның белгілерін байқаған. Медициналық куәландыру 66 жастағы азаматтың каннабиноидтарды қолданып, есірткілік масаң күйде болғанын көрсетті», - делінген хабарламада.

Зейнеткерге қатысты ҚР ӘҚБтК-нің 608-бабы 1-бөлігі бойынша әкімшілік іс қозғалды.

Өткен аптада полиция қызметкерлері көлікті мас күйде басқарған 40 жүргізушіні анықтаған.