Қостанай облысында қабаған ит үш жасар қызды талап тастаған
Балаға шұғыл түрде ота жасалды
Қостанай облысында қабаған ит үш жасар қызды талап, бет-аузының сау-тамтығын қалдырмаған, деп хабарлайды Azattyq Ruhy.
«Алау» порталының жазуынша, оқиға 6 мамырда Тобыл қаласында болған. Үш жасар сәбиге питбуль иті тарпа бас салып, бетін жұлып алған.
Қостанай облыстық балалар ауруханасы хирургия бөлімінің меңгерушісі Игорь Белобржицкийдің айтуынша, бала ауыр халде түскен.
«Қыз бала ауруханаға ауыр халде, шок жағдайынада жеткізілді. Ерні, бет-аузы жыртылған. Шұғыл түрде ота жасалды. Жараларын тіктік. Бала бірнеше күн жансақтау бөлімінде жатты. Қазір жағдайы қанағаттанарлық. Жүгіріп, өздігінен тамақтанып жүр. Тіккен жерлерін дақылап отырмыз. Қабыну болған жоқ. Әдетте, ит тістегеннен кейін жара орны іріңдеп кетеді, әсіресе бет аумағында қауіп көп, себебі инфекция миға шауып кетуі мүмкін. Қазір балада бәрі жақсы. Дене қызуы жоқ. Бірнеше күннен кейін тігістерді алып тастаймыз. Сосын ауруханадан шығарылады», - деді Игорь Белобржицкий.
