«Шындыққа сәйкеспейді»: полиция үш баласын өлтірген күдікті туралы дерекке пікір білдірді

Ақтауда үш баласын бауыздап өлтірді деген күдікке ілінген ер адамға қатысты полиция пікір білдірді, деп хабарлайды Azattyq Ruhy.

Маңғыстау облыстық полиция департаментінің мәліметінше, күдіктінің «Жусан» арнайы операциясы кезінде Сириядан қайтарылғаны туралы ақпарат шындыққа сәйкеспейді. 

«Наурызда Ақтау қаласында балаларын өлтірген деп күдіктелген тұрғынға қатысты берген учаскелік полиция инспекторының мәлімдемесі тексерілді. Полицей күдіктінің қазақстандықтарды Сириядан қайтару жөніндегі «Жусан» бағдарламасының қатысушысы болғанын және есепте тұрғанын айтқан еді.

Бұл ақпараттың шындыққа сәйкес келмейтіні анықталды. Сондықтан қызметкермен алдағы уақытта мұндай жағдайға жол бермеу туралы профилактикалық әңгіме жүргізілді», - делінген хабарламада.

Тақырыпқа орай: «Аллаһқа қайтты, болды» – Ақтауда үш баласын өлтірген күдіктінің әйелінің жауабы жұртты шошытты

Айта кетсек, бұған дейін «Kөреміз» бағдарламасында құқық қорғау органдарының өкілі 36 жастағы Жәнібек Есеновтің «Жусан» операциясы кезінде Сириядан қайтарылғанын айтқан болатын. Есеновтың бұрынғы әйелінің туыстары оның дәстүрлі емес діни ағымның мүшесі екенін хабарлады.

Еске салсақ, наурызда Ақтаудағы көппәтерлі үйлердің бірінен 2011, 2014 және 2016 жылы туған балалардың денесі табылған болатын. Кейіннен балаларын өлтірді деген күдікпен олардың туған әкесі ұсталған еді.