Ақмола тұрғыны иен даладан танкке қарсы 6 мина мен 5 граната тауып алған
Полицейлер ол заттардың айдалада қалай пайда болғанын анықтап жатыр
Ақмола тұрғыны айдаладан танкке қарсы 6 мина мен 5 граната тауып алған, деп хабарлайды Azattyq Ruhy.
Облыстық полиция департаментінің хабарлауынша, Жарқайың ауданына қарасты Тасты-Талды ауылының тұрғыны жарылғыш заттарды 4 сәуірде тапқан.
«Ақмолалықтың айтуынша, қара металды жинау кезінде арнайы құрылғының көмегімен ол шамамен 50 см тереңдіктен алып шыққан. Оқиға туралы ер адам бірден полицияға хабарлаған. Жедел-тергеу тобы мен сапер мамандары дереу жолға шықты. Табылған жарылғыш заттар, атап айтқанда, танкке қарсы 3 мина, жаяу әскерге қарсы 6 мина және F-1 және rid-5 моделді 5 гранаталары тексеріліп, олардың оқу-жаттығулық екені және өмірге қауіп төндірмейтіні туралы қорытынды шығарылды», - делінген хабарламада.
Сондай-ақ полиция мен сапер бригадасы жақын маңдағы аумақты тексеріп, жарылғыш заттарға ұқсас заттар таппаған.
«Аталған дерек сотқа дейінгі тергеп-тексерулердің бірыңғай тізілімінде тіркелді, сараптамалар тағайындалды, құқық қорғау органдары бұл заттардың айдалада қалай пайда болғанын анықтап жатыр», - делінген хабарламада.
