Жетібай тұрғындары ірі құрылыс компаниялары ұсынған жұмыстан бас тартқан

Жетібайлық тұрғындар ірі құрылыс компаниялары ұсынған жұмыстан бас тартқан, деп хабарлайды Azattyq Ruhy агенттігі mangystaumedia.kz-ке сілтеме жасап.

Қарақия ауданы әкімдігінің баспасөз қызметі хабарлағандай, бүгін, яғни 31 наурызда «Альянс LTD», «Ақжол құрылыс», «АЙКОМ LTD» компанияларының басшылары Жетібай ауылындағы жолды жауып, наразылық білдіріп тұрған ауыл тұрғындарымен кездесіп, оларға өз компанияларынан жұмыс ұсынған.

«Құрылыс компаниясынан жетібайлық тұрғындарға жартылай тіркеме көлігінің жүргізушісі, электрик, дәнекерлеуші, учаске бастығы, асфальт төсеу машинисі, жеңіл көлік жүргізушісі, бульдозер машинисі, жүк тиегіш машинисі, жүк көлігінің жүргізушісі, тас қалаушы, сылақшы, бетоншы қызметі ұсынылған. Бос жұмыс орындарының ең төменгі жалақысы – 223 мың теңге, ең жоғары жалақы – 450 мың теңге», - делінген хабарламада.

«LTD Альянсының» директоры Асқар Керелбаевтың айтуынша, ұсынылып отырған бос жұмыс орындары тұрақты жұмысқа жатады, өйткені Маңғыстауда құрылыс маусымы ұзақ жүреді.

«Сіздерге жұмыс керек екенін естігеннен кейін біз тұрақты жұмыс орындарын ұсынып, көмектесуді шештік. Бұл жақсы жұмыс орындары, олардың көпшілігіне арнайы білім қажет емес, біліктілікті арттыруға да көмектесе алады. Оның үстіне біздің компанияларда вахталық әдіспен жұмыс істеуге болады, бір вахта – 15 күн. Нарықтық жалақы алуға болады. Өкінішке қарай, мұнай саласына барлық ниет білдірушілерді жұмысқа орналастыру мүмкін емес, бірақ біз сіздерге нақты жұмыс ұсынып отырмыз», - деді Асқар Керелбаев.

Қарақия әкімдігінің ресми мәліметіне сүйенсек, жиналғандар ұсынылған бос жұмыс орындарынан бас тартып, тек мұнай саласына жұмысқа орналастыруды талап еткен.

Тақырыпқа орай: Маңғыстау облысында аштық жариялаған жұмыссыздардың әрекетіне қатысты әкімдік түсініктеме берді

Еске салайық, бұған дейін Қарақия ауданындағы Жетібай ауылының жұмыссыз тұрғындары аштық жариялағаны хабарланған болатын. Ереуілшілердің мұнай секторына жұмысқа орналасу туралы талабы өзгеріссіз қалды.