Алматыда қаңтар оқиғасы кезінде ұрланған қару Тараздан табылды
Аталған дерекке қатысты сот-баллистикалық сараптамасы тағайындалды
Алматыдағы қару-жарақ дүкенінен ұрланған қару Тараздан табылды, деп хабарлайды Azattyq Ruhy.
ІІМ баспасөз қызметінің мәліметінше, Жамбыл облысында ұрланған қаруды ғана емес, жалпы заңсыз айналымдағы қаруды табу және тәркілеу бойынша мақсатты жұмыстар жалғасып жатыр.
«Кезекті қару жасырылған орынды 12 ақпанда Жамбыл облысы полиция департаментінің есірткі қылмысына қарсы іс-қимыл басқармасының қызметкерлері тапты», - деп атап өтті деді ПД ЕҚҚІБ бастығы Әлім Бажықбаев.
Тараз қаласының Арай иінінде 2022 жылғы қаңтарда Алматы қаласындағы қару-жарақ дүкенінен ұрланған 308 Win калибрлі Benelli Argo-E карабин мылтығы және патронымен бірге 9 мм калибрлі SM Action газ тапаншасы табылып, тәркіленді.
«Аталған дерекке қатысты сот-баллистикалық сараптамасы тағайындалды. ҚР ҚК-нің 287-бабының 3-бөлігі (Қаруды, оқ-дәрілерді жарылғыш заттар мен құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеу амалдары жүргізіліп жатыр. Жедел-іздестіру іс-шаралары барысында біздің қызметкерлер қару-жарақтарды анықтауды және оларды залалсыздандыруды жалғастырып жатыр», – деді Әлім Бажықбаев.
