ШұғылҚазақстанда өткен тәулікте 769 адамнан коронавирус анықталды

«Ақшаларыңды қайтармаймын»: Қаржы пирамидасын құрғандар қалай әрекет еткен

42 мыңнан астам адаммен шарт жасасқан күдіктілер алдын ала болжам бойынша 5 млрд 411 млн теңге шығын келтірген

Фото: instagram/@garant_24

Өткен жылдың қазан айынан бастап Қазақстанның 13 өңірінде тіркелген «Гарант 24 Ломбард», «ЕЅТАТЕ Ломбард», «Выгодный займ» атты үш ЖШС бір уақытта өз жұмысын бастады. Қаржы кәсіпорындарының негізін қалаушысы және басшылары – Ақтөбе облысының тумалары. Олар аталған компаниялардың заңсыз қызметін ұйымдастырған, деп хабарлайды Azattyq Rýhy Polisia.kz сайтына сілтеме жасай отырып.

Азаматтардың мүлкі мен ақшалай қаражатын алу схемасы кеңселерді жайластыру, қызметкерлер штатын жинау және кәсіпорындардың жалған директорларын тағайындап, өңірлік өкілдіктер ашу әрекеттерімен құрылған. Салымшыларды барынша көп тарту үшін қазақстандық эстрада және спорт жұлдыздарының қатысуымен ауқымды жарнамалық науқан жүргізген.

Whats App мессенджерінде ЖШС басшылары чат құрып, оған барлық салымшыларды кіргізген. Аталған ЖШС азаматтардан жылжымалы және жылжымайтын мүліктерді жоғары құнымен бөліп-бөліп сатып алған. Кейіннен 3-5 ай ішінде клиенттерге мәміле сомасының бір бөлігін төлейді, ал осы уақытта қабылданған мүлікті үшінші тұлғаларға нарықтық құнынан төмен сатқан.

Бұдан басқа, аталған компаниялар өз клиенттерінен депозит ретінде ай сайынғы сомадан 30-дан 40%-ға дейін сыйақы төлеуге уәде бере отырып, салымдар қабылдаған. Барлық ақшалай қаражат бас офиске құйылып отырған.

Ағымдағы жылдың 15 ақпанында серіктестіктердің басшылары өз қызметін бір уақытта тоқтатып, ұрланған ақшамен бой тасалайды.

19 ақпан күні «Гарант 24 Ломбард» ЖШС құрылтайшысы, 1993 жылы туған Мырзабеков Аслан Пазылжанұлы WhatsApp чатында салымшыларға «Мен сендердің ақшаларыңды қайтармаймын. Сенімдерің үшін рахмет! Тегін ақша әуесқойлары! Бәріңіз сау болыңыздар!» деген хабарлама қалдырды.

Сол күні әр аймақтардағы ішкі істер органдарына азаматтар жылжымалы және жылжымайтын мүліктерін, сондай-ақ ақша қаражаттарын заңсыз иеленуге байланысты шағым түсіре бастады. ІІМ Тергеу департаментінің және аймақтық Полиция департаменттерінің қызметкерлерінен тез арада жедел-тергеу тобы құрылды.

Бүгінгі күні қылмыстық жауапкершілікке тарту туралы 2 мыңнан астам өтініш келіп түсті. Бүкіл республика бойынша компания кеңселерінде тінту жүргізілді, бірлескен қызмет туралы шарттар, бухгалтерлік құжаттама, ноутбуктер, оргтехникалар, зергерлік және басқа да бұйымдар алынды.

Алынған құжаттарға қарағанда, компаниялар 42 мыңнан астам адаммен шарт жасасқан. Алдын ала деректер бойынша келтірілген шығын мөлшері 5 миллиард 411 миллион теңгеге бағаланады. Аталған фактілер бойынша 190 (алаяқтық) және 217-бап (қаржы пирамидасы) негізінде 22 қылмыстық іс тіркелді.

13 адам қамауға алынды. Мемлекетаралық іздеудегі 9 күдікті анықталды, оның ішінде А.П.Мырзабеков бар.

«Соңғы уақытта алаяқтық фактілер туралы өтініштердің саны артты. Қалыптасқан жағдай азаматтардың тез табысқа кенелгісі келетінін көрсетеді. Осы мақсатта олар күмәнді ұйымдармен ойланбастан мәмілелер жасайды, қысқа мерзімде үлкен сыйақы алудан үміттеніп, әлгіндей ұйымдарға жинақ салады. Мұны алаяқтар сәтімен пайдаланып, әр түрлі схемаларды қолдана отырып, қаржылық пирамидалар құрады», – деп атап өтті ІІМ Тергеу департаменті.