Петропавлда құбыр жарылып, қалаға кірер жол жабылды

Петропавлда құбыр жарылып, қалаға Астана трассасы арқылы кіреберіс жол жабылды. Жұмысшылар апат орнында жұмыс істеп жатыр, деп хабарлайды Azattyq Ryhy тілшісі.

Облыс орталығын сумен қамтушы «Қызылжар су» коммуналдық мекемесі баспасөз қызметінің мәліметінше, бүгін түнгі сағат 4:00 шамасында диаметрі 800 мм су құбыры жарылған. Апат 314 атқыштар дивизиясы көшесінде тіркелді. Апат орнында арнайы бригада жұмыс істеп жатыр.

Құбырдың жаңаланғанына 15 жыл болған.

«Тұрғындардың барлығында су бар. Тек Береке және Жұмысшы кенті аудандарында қысым төмендеді. Темір жол мен «Радуга» серіктестігінің қоймаларын, бірнеше үйді су басты. Апат салдарын жою үшін бір тәулік жұмыс істеу қажет болады. Күнннің суығы кедергі келтіріп тұр. Құбырды ауыстырған мердігер компания қазір жоқ», - деді «Қызылжар су» ЖШС атқарушы директоры Арман Саутов. 

Қыс басталғалы Петропавлда 3 рет ірі апат тіркелді.