Үндістанда қираған көпірге қатысты 9 күдікті ұсталды

Үндістанда қираған көпірге қатысты 9 күдікті ұсталды. Мамандар қайғылы оқиғаның алдында бір топ адамның көпірді теңселтпек болған әрекеті бейнекамераға түсіп қалғанын айтады, деп хабарлайды Azattyq Ruhy «Хабар 24»-ке сілтеме жасап.

Мұны апат орнында болған куәгерлер де растап отыр. Әзірге көпірде адам санын бақылауда ұстай алмаған 3 күзетші, бірнеше кассир мен құрылыстың жөндеу жұмысына жауапты екі адамға қатысты іс қозғалды.

Естеріңізге салайық, Гуджарат штатында аспалы көпір опырылып, 141 адам мерт болған еді. Марқұмдардың арасында балалар мен әйелдер көп. Құрылыс нысаны қирағанда онда 500-ге жуық адам болды. Тергеу ісі жалғасып жатыр.