Нұр-Сұлтанда жертөледен заңсыз ойын мекемесін ашып алған тұрғын анықталды

Қаржылық мониторинг агенттігі Нұр-Сұлтан қаласы бойынша департаменті заңсыз «Покер» ойынын ұйымдастыру фактісін анықтады, деп хабарлайды Azattyq Ruhy.

«Елорда тұрғыны заңсыз материалдық пайда табу мақсатында тұрғын үйлердің бірінің жертөлесінен заңсыз ойын мекемесін ашып, қолма-қол ақшаға фишкаларды сату және алу арқылы құмар ойынын өткізген. Қазір тергеу амалдары жүргізіліп жатыр. Бұл азамат 4 жылдан 7 жылға дейін бас бостандығынан айырылуы мүмкін», - делінген хабарламада.

Айта кетерлігі, жыл басынан бері агенттік 82 ойын мекемесінің, оның ішінде 4 астыртын казиноның қызметін тоқтатқан. Ойын автоматтары, терминалдар, покер үстелдері, рулетка үстелдері, компьютерлер, ұялы телефондар сияқты 3 мыңға жуық зат, сондай-ақ 5 млн теңгеден астам сомаға қаражат түріндегі айғақтар тәркіленді.

«Құрметті азаматтар! Сіздің үйіңізде немесе ауданыңызда орналасқан заңсыз ойын мекемелері туралы ақпарат болса, Агенттіктің және аумақтық департаменттердің сенім телефондарына тәулік бойы хабарлауыңызды сұраймыз», - деді ведомство өкілдері.