Ақтөбеде ХҚКО қызметкерлері жүргізуші куәлігін сатумен айналысқан

Ақтөбе облысының Полиция департаменті азаматтарға 200 мың теңге ақшалай сыйақы үшін жүргізуші куәлігін алып берумен айналысқан ұйымдасқан қылмыстық топты ұстады. Топ мүшелері Мамандандырылған ХҚКО-ның қызметкерлері болған, деп хабарлайды Azattyq Ruhy тілшісі Polisia.kz-ке сілтеме жасап.

Жүргізілген жедел-іздестіру іс-шаралары барысында емтихан тапсыруға арналған сыныпқа кіре берісте міндетті теориялық емтиханнан өту кезінде ХҚО қызметкерлері белгілі бір кандидаттарды металл іздегішпен тексермей, тізім бойынша кедергісіз өткізгені анықталды.

Сонымен қатар алдын ала ақша берген кандидаттардың тізімін азаматтық тұлғалар, яғни топ мүшелерінің сыбайластары жасап отырған.

«Емтихан тапсырушы құлапқаптармен, микрофонмен және камерамен жабдықталып, компьютер сыныбына өтіп, мониторда шыққан сұрақтарды қылмыстық топтың мүшесіне көрсетіп отырған. Ал ол өз кезегінде жалдамалы пәтерде отырып, оған дұрыс жауаптарды нұсқаған. Сондай-ақ топтың тағы бір мүшесі емтихан кезінде көрші кабинетте отырып, оларды роутердің көмегімен интернетпен қамтамасыз еткен», - делінген хабарламада.

Осылайша, азаматтар тестті заңсыз  тапсырып, жүргізуші куәліктеріне қол жеткізген.

«Жалдамалы пәтерді тінту кезінде полиция қызметкерлері 6 690 000 теңге, 1800 АҚШ долларын тәркіледі. Сондай-ақ мини-құлаққаптар, кішкентай бейнекамералар, камералары бар емтихан тапсыруға арналған жилеттер, қуаттау құрылғысы және тағы да  басқа заттар тәркіленді», - делінген хабарламада.

Сонымен қатар жеке тексеру кезінде бір емтихан тапсырушыдан марихуанаға ұқсас өсімдік тектес зат табылды. Арнайы операция барысында Мамандандырылған ХҚКО-ның ауласында өз кезегін күтіп тұрған, өзіне қажетті техникамен жабдықталған тағы бір азамат ұсталды.

Қазіргі уақытта қылмыстық схемаға тартылған адамдардың әрекеттері құжатталды және тергеу амалдары жүргізіліп жатыр.