Шымкентте жасөспірім қыз өртке оранған үйден бір жасар егіз бауырларын аман алып шықты

12 жастағы шымкенттік қыз өрте оранған үйден бір жасар егіздерді аман алып шықты, деп хабарлайды Azattyq Ruhy тілшісі OTYRAR басылымына сілтеме жасап.

Оқиға өткен жұманың түнінде Қайнарбұлақ саяжайында болған. Ата-аналары балаларын ұйықтатып, өздері көрші үйге сүтке кеткен.

Жасөпірім креслодан түтін иісі шыға бастағанда өрт басталғанын түсінген. Ол өртті өздігінен өшіруге талпынғанымен, қызыл жалын күшті болған. Дәл сол бөлмеде бір жастағы егіз бауырлары ұйықтап жатқан. Ол ұзақ ойланбастан, інілерінің бірін көтеріп далаға алып шығады. Артынша өз қорқынышын жеңіп, көк түтінге оранған үйге кіріп, екінші інісін құтарады.

«Қос бауырын қолына ұстап, кезек далаға алып шыққан. Сосын маған «Анашым, інімнің екіншісін құтқару үшін біріншісін жерге жатқызуға мәжбүр болдым. Мені кешіріңдерші» деді. Шынын айтсам, өзім қатты таңғалдым. Ол әлі өзі бала ғой, қорқып, далаға қашып кетсе де ештеңе істей алмас едік. Інілерін шығарғаннан кейін ұзақ уақыт аяқтары дірілдеп, қорқып тұрды. Кейіннен біз балаларды көршілердің үйіне алып бардық, үйіміздің толықтай жанып кеткенін айтпадық», - деп еске алды Мария Саворовская.

Құтқарушылар келгенге дейін өртті сөндіруге көршілері көмектескен. Мария қайғылы оқиғадан ғажайыптың арқасында шықтық деп отыр. Егер от газ баллоны тұрған жуынатын бөлмеге жеткенде, үйдің күлі көкке ұшатын еді. Өртке кондиционер сымдарының ақауы себеп болуы мүмкін.

«Кондиционер креслоның үстінде ілініп тұр. Меніңше, сымдардан ақау кетті. Диван мен креслоның іші синтепоннан жасалған, ол өте тез жанады. Біз келгенде үй жанып жатқан. Каркассыз бассейніміз бар еді, содан шланг арқылы өртті сөндірмекші болдық. Құтқарушылар келгенге дейін өртті сөндіріп үлгердік», - деді үй иесі Мария.

Үйсіз қалған отбасыға жас жігіт қолұшын созып, уақытша баспана және азық-түлік берген. Батыр қыз бен екі інісі қазір толықтай қауіпсіз жерде, ал олардың ата-аналары үйлерін қайта қалпына келтіруде. Өрт кезінде үйдегі барлық мүлік жанып кеткен.