СҚО-да жылқы тұмауы тіркелді

Солтүстік Қазақстанның Есіл аудында жылқы тұмауы тіркелді. Қамбар ата түлігі жаппай ауырып жатқан Чириковка ауылында шектеу шаралары енгізілді. Оған сәйкес елді мекеннен жылқы және оның өнімдерін тасымалдауға тыйым салынды, деп хабарлайды Azattyq Ruhy тілшісі.

Инфекция ошағында дезинфекциялық шаралар жүзеге асырылып жатыр. Мамандардың айтуынша, өңірде бұрын-соңды мұндай ауру тіркелмеген. Жылқы иелерінің сөзінше, малдың қызуы көтеріліп, жөтеледі. Танауынан су ағып, тәбеті тартпай, әлсіреп қалады.

«Мал шығыны тіркелген жоқ. Бұл – инфекциялық ауру. Дерт адамға жұқпайды. Карантинге жабылған ауылда мониторинг жүргізіліп жатыр. Ветеринарлар ауырған малды емдеп жатыр. Оларға антибиотик салынуда. Жалпы алғанда жағдай тұрақты. 15 күннен кейін шектеу шаралары алынады», - дейді Облыстық ветеринария басқармасының бөлім басшысы Қайырлы Қазанов.

Малдың ауырғанына 10 күндей уақыт болған. Ауыл тұрғындарының айтуынша тәулік сайын үйірде жөтелген жылқы саны көбейіп келеді. Ал өңірде қаншасы ауырып жатқаны белгісіз.

«Өз тәжірибемде мұндай ауруды көрген емеспін. Белгісіз індет жайында әкімдікке, мал иелеріне айттық. Көктемде кене көп болды, паразиттен арылдық па дегенде осындай проблема пайда болды. Әдетте жыл сайын шілдеде жылқыларға сақау шығатын. Ал мұндай ауруды көрген емеспін. Қызір күндіз ыстық, кеште салқын болып тұр. Ауа темпрературасы тез өзгеріп жатқасын салқын тиіп қалды ма деген де ой болған. Жалпы былтырғы құрғақшылықпен салыстырғанда биыл жылқылардың жағдайы жасқы, күйі жаман емес. Енді малдарды осы жылқы тұмауынан айықтырып алу қажет. Ветеринарлар антиботикпен тәуір болып кететінін айтты. Солай боларына сенеміз», - дейді жылқышы Самархан Сәдуақасов.