ДДҰ коронавирусқа «Халықаралық деңгейдегі қауіп» деген баға берді
Соңғы ресми мәлімет бойынша індет 2,4 мың адамға жұққан
Дүниежүзілік денсаулық сақтау ұйымы (ДДҰ) Қытайдағы коронавирустың қаупіне халықаралық «жоғарғы» деңгейдегі қауіп деген баға берді, деп хабарлайды Azattyq Rýhy.
«Ұйым бұған дейін індетке қатысты жағдайды халықаралық деңгейде «орташа қауіпті», ал Қытай үшін «аса қауіпті» деп бағалаған еді. Алайда сарапшылардың айтуынша, бұл тұжырымда қате кеткен, қазір оған түзету енгізілді», деп жазады APF.
Коронавирусты жұқтыру ошағы қытайлық Ухань қаласы болып отыр. Қытай билігі қаланы карантинге жапқан. Қазіргі уақытта Ухань қаласының 4 мың тұрғыны шетелдерде туристік сапармен жүр.
Айта кетсек, бүгінгі таңда қауіпті індет 2,4 мың адамға жұққан. Вирус ондаған миллион тұрғыны бар Ухань қаласына ғана емес, Қытайдың көптеген қалаларына, сонымен қатар, бірқатар шет мемлекетке тарап үлгерген.
27 қаңтар күнгі ресми мәліметке сүйенсек, коронавирустан 81 адам көз жұмған.
