Түркістан облысында автокөліктің VIP-нөмірлеріне жалған түбіртек жасалған
Төлемдердің болмағанын облыстың Мемлекеттік кірістер департаменті растады
Түркістан облысында автокөліктің VIP-нөмірлеріне жалған түбіртектер рәсімделген, деп хабарлайды Azattyq Rýhy тілшісі.
Түркістан облысында нөмірлерді сату кезінде сыбайлас жемқорлыққа талдау жасалды, оған сәйкес жалпы сомасы 71 809 667 теңгеге мемлекеттік баж салығы төленбеген. Төлемдердің болмағанын облыстың Мемлекеттік кірістер департаменті растады.
Антикордың мәлімдеуінше, түбіртектерді қолдан жасау және чекке қосымша сандарды қосу арқылы төленген мемлекеттік баж сомасын көбейту әрекеттері жүзеге асырылған.
«Мұндай сыбайлас жемқорлық тәуекелі мемлекеттік кірістер органдарының және екінші деңгейлі банктердің және «Қазпочта» АҚ деректер базаларының интеграцияланбауынан, сондай-ақ уәкілетті органдардың (Ішкі істер министрлігі, Мемлекеттік кірістер комитеті, ҰК» АҚ) арасындағы мәліметтерді салыстыру бойынша жүйелі жұмыстың болмауынан туындап отыр», – делінген құжатта.
Антикор осындай Сыбайлас жемқорлыққа қарсы мониторингті еліміздің барлық өңірінде өткізуді ұсынады.
