Жамбыл облысында көлік апатынан қаза болғандар саны 20% артып кеткен

Azattyq Rýhy

Екі айда Жамбыл облысының аумағында 169 жол-көлік оқиғасы тіркелген

Жамбыл  облысында көлік апатынан қаза болғандар саны 20% артып кеткен

Жамбыл облысында  жол көлік апаты күрт артып кеткен. Осы жылдың тек екі айында Жамбыл облысының аумағында 169 жол-көлік оқиғасы тіркелген. Бұл туралы Жамбыл облысы Полиция департаментінің бастығы, полиция генерал-майоры Арманбек Баймурзин мәлімдеді, деп хабарлайды Azattyq Rýhy

Бұл сандар өткен жылдың осы кезеңімен салыстырғанда 19,9%-ға жоғары. Ал онда қаза тапқандардың саны 20,8%-ға, жарақат алғандар 27,5%-ға артқан. Бұл – алаңдатарлық статистика.

«Жүргізілген талдау нәтижелері көрсеткендей, көлік апаттарының 99 пайызы жүргізушілердің кінәсінан орын алған. Көлік жүргізушілері көп жағдайда жылдамдықты асырады немесе рульде ұйықтап кетеді.

Сондай-ақ жолдың белгіленбеген бөлігінен немесе бағдаршамның тыйым салынған белгісінен кесіп өтетін жаяу жүргіншілер де ережені жиі бұзады, осылайша олар өз денсаулығы мен өміріне қауіп төндіруде»,- деді Баймурзин. 

ПД бастығының сөзінше, жамбылдық полицейлермен жол-көлік апаттарының алдын алу, жүргізуші тәртібінің деңгейін арттыру мақсатында тұрақты түрде «Автобус», «Қауіпсіз жол», «Балалардың жолдағы қауіпсіздігі», «Құқықтық тәртіп» жедел-профилактикалық іс-шаралары жүргізіліп келеді. Жол апатының орын алуына жолдың сапасыздығы да себеп. Осығай байланысты, Полиция департаменті жергілікті атқарушы органдармен бірлесіп, 2627 шақырым жолды қамти отырып, облыстың автомобиль жолдарына 424 тексеру жүргізді. Нәтижесінде 1771 ақау анықталып, кемшіліктерді жою бойынша нұсқама берілді. 33 лауазымды тұлға әкімшілік жауапкершілікке тартылған.

«Жоғарыда келтірілген статистиканың артында жақынынан айырылған адамдар тұрғанын ұмытпайық. Ең бастысы – жол қозғалысы ережесін сақтаңыз. Есіңізде болсын, жол – қателікті кешірмейді!», - деді  Арманбек Баймурзин.

×
Бұл желілік ресурстың ақпараттық өнімдері 18 жастан асқан адамдарға арналған.