Ақмола облысында өрттен үш адам қаза тапты

Ақмола облысы Купчановка ауылында жеке тұрғын үйде болған өрттен үш адам көз жұмды, деп хабарлайды Azattyq Rýhy.

«Бүгін, 01.03.2022 жылы Бұланды ауданының Купчановка ауылында 81 шаршы метр жеке тұрғын үйде өрт орын алды. Өрт сөндіру бөлімшесі келген уақытта үй толығымен отқа оранған. Өрт сөндіру барысында өрт орнында 1976 ж.т. және 1987 ж.т. екі әйел мен 1994 ж.т. ер адамның мәйіті табылды», - делінген облыстық ТЖД хабарламасында.

Бір адам терезені сындырып шығып аман қалып, оқиға орнына өрт сөндірушілерді шақырған.

«Алдын ала ақпарат бойынша, үй иесі – 1976 жылы туған әйел отбасылық мерекеде, достарының арасында ұлының кәмелетке толғанын атап өтпек болған. Осылайша келген қонақтар өрт кезінде үй иесімен бірге қаза тапқан. Оқиға туралы кештетіп жеткен хабар өрттің тез таралуына әкелді, бірнеше минут ішінде үй толығымен отқа оранды», – деді Ақмола облысы ТЖД Мемлекеттік-өрт бақылау басқармасының бастығы Думан Далешов.

Өрт 03:10-да ауыздықталып, 04:55-те жойылды. Макинск қаласының 8-МӨСБ-нан өрт шыққан жерге дейінгі қашықтық – 25 шақырым. Өрттің себебі мен қаза болу жағдайлары анықталуда, сот-медициналық сараптама тағайындалды. Оқиға орнына ТЖД 11 қызметкері мен 3 бірлік техникасы шықты.

Ақмола облысының Төтенше жағдайлар департаменті облыс тұрғындары мен қонақтарына өрт қауіпсіздігі шараларын сақтау қажеттігін ескертеді.